þa
ða se engel ðus gereht hæfde. ða oflicode me
ðearle þæt ic eft to ðam lichaman sceolde
fram ðære stowe wynsumnysse. and ðæra halgena
geferrædene. ne dorste ic swa ðeah nán ðing
wiðcweðan; Æfter ðisum ic wearð gebroht.
and geedcucod betwux mannum;
Drihthelm
wunode ða on ðæs mynstres digelnysse. oð his lifes ende
stiðlice drohtnigende;
Hé
eode gelome on winterlicum cyle to ðære éá. and
stód on his gebedum on ðam wætere. hwilon to his gyrdle.
hwilon to his swuran;
Eode
him siððan mid ðam ylcum claðum. oð þæt
hí on his lichaman wearmodon and adruwodon;
Ða
ða hine man axode hu he mihte ðone micclan cyle forberan. hé
andwyrde; Maran cyle ic geseah. and wyrsan;
Eft
ða ða hí axodon hú hé mihte swa stearce forhæfednysse
healdan. hé andwyrde; Stiðran and wyrsan ic geseah;
Swa
hé hit macode on his life. and manega oðre gerihtlæhte.
mid worde and gebysnunge;
We
rædað gehwær on bocum. þæt oft and gelome
men wurdon of ðisum life gelædde. and eft to life arærde.
and hí fela wítnungstowa. and eac halgena wununga gesawon.
swa swa greogrius se halga papa awrát on ðære bec þe
is gehaten dialegorum. be ánum men þæt his sawul wearð
gelædd of ðisum life. and fela ðing geseah;
þa betwux ðam oðrum geseah hé hwær man bytlode
ane gebytlu eal mid smætum golde. and ða wyrhtan worhton ða
gebytlu on ðam sæternesdæge. and wæs ða fornean
geendod;
/
Him wæs gesæd. þæt hi wæron gemynte anum
sutere on romana byrig. and hine eac namode;
/
Æfter ðisum arás se deada. and axode geornlice ymbe ðone
sutere hu hé geworht wære. on woruldlicere drohtnunge. and
man afunde ða þæt his gewuna wæs. þæt
he worhte his weorc to seofon nihtum. and sealde on ðone sæternesdæg.
Nam ða of his cræfte him bigleofan.
and
dælde ðone ofereacan þearfum mid estfullum mode. and wæron
for ði þa gebytlu on ðam dæge swiðost geworhte.
ðe hé ða ælmessan gewunelice dælde;
Micel
is godes mildheortnys ofer mancynne. þam ðe wel willað;
We
on ðisum life magon helpan þam forðfarenum ðe on witnunge
beoð. and we magon us sylfe betwux ús on life ælc oðrum
fultumian to ðam upplican life. gif we ðæs cepað. and
ða ðe fulfremede wæron and to godes rice becomon. magon
fultumian ægðer ge ús. ge ðam forðfarenum þe
on wítnunge sind. gif hí mid ealle forscyldgode ne beoð;
Sy
wuldor and lof. ðam welwillendum gode. A. on ecnysse. amen: